فلسفة حمار..

عجبى عليك يا ابن آدم يا كبير الدار
قومت الدنيا وما قعدت لما قالو حمار
هو اسمى شتيمة ولا جنسى ده عار؟!!
خلقنى ربى وخلقك ولا حدش له خيار
وانا مهما زاد الحمل فوقى صابر على المشوار
لا فى يوم اقول اشمعنى اخويا ولا اخد منه تار
ولا يوم ابص لرزق غيرى ولا اطق منه وأغار
ولا ارفع فى يوم عينى على جارتى واصون الجار
لا مهر ادفع لحمارتى وشبكة وسوار
ولا شقة اجمع فى ثمنها ولا اجهز دار
ولا حرمى حامل تتوحم عايزة كافيار
ولا بنت تخرج عن طوعى وتجيب العار
ولا ابن يدمن ويهلوث ويقع ينهار
عايش فى حالى متهنى وليه احتار؟
باكل وبشرب وبنهق ومفيش اسرار
وعندى ابن آدم يخدمنى ليل ويا نهار
ان جعت يشترى لى برسيمى بأغلى الاسعار
وفى مرضى يفضل يعالجنى ويدعى الستار
خادم امين من غير راتب ولا حتى ايجار
ودلوقتى عرفت يا ابن آدم من فين فينا حمار؟؟؟؟؟؟؟؟؟؟؟