لقيت فانوس مرة و دعكته
طلعلى عفريت قاللى شبيك لبيك
قلت خلاص الذل ودعته
و يا عفريت بالطلبات ههريك
قالى ههاأو....ياناس
دانا عفريت ابن جان
مايهمنيش مكان ولا زمان
و اطلب و انا عندى البرهان
قلتله : عايز قمح يتزرع فى مصر
و مسئولين يبطلو فشر
و حكومة متعصرنيش عصر
و مرتب يكفى لاخر الشهر
و عاوز عيش من غير طوابير
و انفاق حكومى من غير تبذير
و عاوز فى بيتى شيكارة دقيق
و سبب مقنع لاى حريق
و مجلس شعب بدون تصفيق
و فى كاس العالم لينا فريق
و عاوز مرة ازور شرم الشيخ
و صباعين كفتة من اللى فى السيخ
و اشرب مرة عصير بطيخ
و اخرج من القسم بدون تلطيخ
و نفسى الضحكة ترجع تانى
و حتة لحمة كندوز او ضانى
و جنية مصرى زى البرانى
و رصيف للمشى انا و خلانى
رد العفريت عليا بغشم و قال
يا مصرى ماكنش العشم
انا ممكن انقل لك الهرم
و اسد لك الاوزون اللى اتخرم
و ارجع لك الاكل اللى اتهضم
و تمأمأ البقرة زى الغنم
و اعملك قصر من العدم
و اقولك معنى شرم برم
بس طلباتك طلبات ملموس
عقله خلاص اكله السوس
و احنا بناخد منكم دروس
ازاى نخلى الجن متعوس
و يا ريت ترجعنى الفانوس
و زى بعضه اعيش محبوس
بدل ما اخرج و اتبهدل زيك
و يتلم موكوس على متعوس
_ _ _ _ _ _ _ _ _ _ _ _ _ _ _
السبت 28 أغسطس 2010 - 21:24
