لما تكون مخنوق .... اشرب بمناخيرك !!!!

تاريخ التسجيل : 14/11/2009

النهاردة إن شاء الله , سنتناول موضوع يهم الشباب من الجنسين -أكيد مش كريم 14 -

دلوقتي طبعا كلنا عارفين , ان الواحد لو عاوز يريح "ودانه" .. "هيشرب" عصير مانجة !!!

و لو عاوز يدلع "مناخيرة" ... "هيسمع" أغنيتين كدة "تحت اللسان" ,,,, !!!

أما بقى لو عاوز يمتع "عينيه" ... فعليه و على one man show "ريحة" ما حصلتش !!!

حد حاسس بأي حاجة غلط ؟؟ !!
و لا ما حدش واخد باله أصلا ؟؟؟

متهيأ لي فيه غلطة بسيطة

ان اللي عاوز يريح ودانه ... يسمع حاجة حلوة -و بلاش أغاني -

و اللي عاوز يريح مناخيره .... يشم ريحة حلوة -و بلاش one man show برضه -

أما لو عاوز تمتع عينيك .... يبقى هتتفرج على مناظر طبيعية خلابة -حلوة خلابة دي ..

يعني ايه ؟؟ -

حد عارف أن اعاوز ايه ؟ و لا لسه ؟؟

بص يا سيدي ,,,

دلوقتي لو جنابك مخنوق ؟؟
و مش طايق نفسك ..

بتعمل ايه ؟؟

غالبا يعني , بتعمل حاجة تريح أعصابك ... تسمع موسيقى هادية , أو موسيقى صاخبة تتنطط معاك و تطلع الـ"باور" اللي جواك , أو "تترزع" قدام التليفزيون تتفرج على أي حاجة "مسلية"
أو لو كنت في الكلية مثلا , تكلم الـ"girl friend" بتاعتك و تمشي معاها شوية و تشتغلوا بعض علشان تستريح , أو لو ربنا كارمك و "دادي" جايب لك عربية, تتطلع "تخمس" بيها شوية .... أو أو أو أو ... حاجات كتيرة ممكن تعملها لما تبقى مخنوق .

صح ؟؟
صح و لا لأ؟؟
أكيد معظمنا بيعمل حاجة من دول ,

بس لو جينا ناخد العملية "جد" شوية ,, و تيجي نشوف ايه "الحتة" اللي بتبقى عاوزة "تتظبط" لما بنبقى مخنوقين ؟؟
يعني ممكن تقول انها : نفسك , قلبك , روحك , .... من الآخر "جواك " هو اللي بيبقى عاوز يتظبط ,

لكن للأسف بنروح جايين و بكل غباء, بدل ما نظبط روحنا , نروح "شغالين" على حاجة تانية نظبطها , أكننا بالضبط عاوزين نريح وداننا رحنا رايحيين نشرب عصير !!!

في حين اننا المفروض لما نكون مخنوقين , نشوف ايه اللي بيسعد و يريح الروح و النفس و نعمله , مش نروح نعمل اللي بيريح الحاجات التانية في جسمنا و نعمله ...

طيب و ايه اللي بيريح الروح ؟؟
باختصار ......, الصلة بالله عز وجل ,
بأي نوع من أنواع الطاعة ,,
تصلي , تتوضى -حتى لو اتوضيت بس و ما صليتش- , تقرأ قرآن , أو حتى يا سيدي تقعد ساكت كافي خيرك شرك , بس ما تروحش تظبط حاجة تانية غير الحاجة اللي عاوزة تظبيط ,

طيب أنا راضي ضميرك يا راجل ,
عمرك كنت مخنوق , و رحت سمعت شوية موسيقى و لا مشيت مع واحدة و لا جريت بالعربية , و حسيت انك استريحت ؟؟

آه !!!

أيوة استريحت ,, "لحظيا" لكن أول ما خلصت رجعت لك الخنقة تاني , ده لأنه ما عالجتش المكان اللي عاوز يتعالج ,

و اسمع لكلام ابن القيم في الموضوع ده :

"إن في القلب فاقة لا يسدها شيء سوى الله تعالى أبدا وفيه شعث لا يلمه غير الإقبال عليه وفيه مرض لا يشفيه غير الإخلاص له وعبادته وحده فهو دائما يضرب على صاحبه حتى يسكن ويطمئن إلى الهه ومعبوده فحينئذ يباشر روح الحياة ويذوق طعمها ويصير له حياة أخرى غير حياة الغافلين المعرضين عن هذا الأمر الذي له خلق الخلق ولأجله خلقت الجنة والنار وله أرسلت الرسل ونزلت الكتب ولو لم يكن جزاء إلا نفس وجوده لكفى به جزاء وكفى بفوته حسرة وعقوبة"

يبقى لما تبقى مخنوق , و تيجي تطلع زهقك , افتكر على طول انك مش بتعالج الجزء الصحيح , انت بتدي "مسكنات" لأماكن "تانية خالص" غير الأماكن اللي المفروض تعالجها ..

خليك ذكى واكسب راحتك فى دنيتك والجنة فى اخرتك بطاعتك لربك وقربك ليه..

أنا طولت عليكم , صح ؟؟

بس أرجو أن تكون الفكرة قد وصلت ,,,

وياريت نبدأ ناخد خطوات بجد علشان نتغير ..

تاريخ التسجيل : 08/02/2011

تسلم ايدك بجد توبيك رااااااااااااااااااائع جداااااااا وفعلا افضل حاجه لانك تستريح القرب من الله

تاريخ التسجيل : 25/07/2010

عندك حق يا عادل فعلا القرب من ربنا اجما حاجة فى الدنيا

تاريخ التسجيل : 14/11/2009

ميرسي كتير لمروركما الجميل

» عاملت فيها نيوتن ؟؟طيب اشرب بقى
» من الذكاء ان تكون غبيا في بعض المواقف