وتوتة توتة
حلاوة زمان
أحمد فؤاد نجم
- شفت يا سيدي الفينال؟
هكذا قال عبده شمة للقزعة الذي كان منشغلاً أو متشاغلاً بتظبيط الموبايل فقال شمة وهو يوجه كلامه نحوي:
- أهو صابه البكم أو الصمم أو العمي الحسي.
وضحك القزعة وهو يقول:
- برضه مش ح أرد عليك:
فقال عبده ضاحكًا:
- أمال لسانك اللي أطول من جسمك وديته فين؟
فقال القزعة:
- أقول لك ولا تزعلش؟
فضحك عبده شمة بشدة وقال للقزعة:
- بس لو ماكانش دمك خفيف يا مضروب!
قلت له:
- يعني لو ما كانش دمه خفيف كنت ح تعمل فيه إيه؟
قال شمه:
- وطبعًا يا عم أحمد أنت داخل تهدي النفوس.
قلت له:
- الله يفتح عليك أنا فعلاً داخل أهدي النفوس.
فقال لي القزعة:
- بس شفت صاحبك معمر عمل إيه؟
وضحك عبده شمة وهو يقول:
- دا كان فعلاً معمر الطاسة.
قلت له:
- لأ يا شمة القذافي مش منهم دا حتي ما بيشربش سجاير.
وقال شمة بدهشة:
- يا سلام!
فقال القزعة ضاحكًا:
- بتحصل في أحسن العائلات يا غيبوبة.
فقال عبده شمة للقزعة:
- أمال ما حصلتش في عيلتكم ليه يا قزعة؟
قال له:
- قلة فضا وحياتك يا غيبوبة.
وضحكنا جميعًا وفجأة سألني عبده شمة وهو يقول:
- اللهم اجعله خير لكن قول لي يا عم أحمد .
قلت له:
أقول لك يا غيبوبة عايزني أقول لك إيه؟
قال:ش
- إحنا هنا قاعدين نضحك رغم اللي حاصل وحتلاقي ناس زينا في مكان تاني قاعدين يضحكوا وأنا متأكد إن السادة الأفاضل ملوك وأمراء ورؤساء الدول العربية قاعدين يضحكوا برضه بينهم وبين بعض حتي ولو في الموبايل.
فقال أحمد القزعة متحمسًا لشمة:
- تصدق يا غيبوبة إن دماغك حلوة طب والله الواد ده أوقات بيفهم يا عم أحمد.
فقال شمة:
- بعض ما عندكم يا ضئيل.
فقال القزعة ضاحكًا:
- خسئت يا قميء وثكلتك أمك «ثم سألني» هي أمه اسمها إيه؟
قلت له:
- حنفي.
وانفجر شمة في ضحك هستيري طويل وهو يضرب لنا كفًا علي كف وقال:
- ع القمة العربية
واتفرج يا سلام
والأمة العربية
نيام نيام نيام
فأكمل القزعة
عيان بـ ... في ميت
با لذمة مش حرام؟
وتوتة توتة توتة
هنا وخلص الكلام
الثلاثاء 10 أغسطس 2010 - 3:31